APR yisanze mu itsinda B rya CECAFA Kagame Cup 2025, aho iri kumwe na NEC yo muri Uganda, Bumamuru yo mu Burundi, ndetse na Mlandege yo muri Zanzibar nyuma ya tombola yabaye mu gitondo cyo kuri uyu wa Kane, tariki 28 Kanama 2025.

CECAFA Kagame Cup y’uyu mwaka, izitabirwa n’amakipe 12, aho izabera i Dar es Salaam muri Tanzania guhera tariki 2 kugeza 15 Nzeri 2025.

APR izakina iri rushanwa initegura imikino y’ijonjora rya mbere muri CAF Champions League, aho izacakirana na Pyramids yo mu Misiri, yegukanye irushanwa riheruka.

Imikino ibiri izahuza APR na Pyramids yamaze no kwegezwa inyuma na CAF, aho ubanza uzaba tariki 1 Ukwakira 2025 kuri Amahoro Stadium, naho uwo kwishyura ukinwe tariki 5 Ukwakira 2025 mu Misiri.

Umwaka ushize, APR yatsindiwe ku mukino wa nyuma wa CECAFA Kagame Cup na Red Arrows yo muri Zambia kuri penaliti 10-9 nyuma y’uko amakipe yombi yari yanganyije 1-1.

APR ntirabasha kwegukana igikombe cya CECAFA Kagame Cup igikuye hanze y’u Rwanda, dore ko ibikombe bitatu byose ifite yabitwariye i Kigali – mu 2004, 2007, 2010, byose byakiniwe mu Rwanda.

Iyi kipe y’Ingabo z’u Rwanda iherutse gutegura irushanwa yise Inkera y’Abahizi, irisoza itsinze umukino umwe gusa muri ine yakinnye, aho yatsinze Power Dynamos ibitego 2-0, itsindwa na AS Kigali, Police, ndetse na Azam.

Biteganyijwe ko umukino wa mbere wa shampiyona y’umwaka w’imikino wa 2025-26 APR yari kuzakina na Marines tariki 14 Nzeri 2025, uzimurwa mu gihe iyi kipe yaba ikiri muri CECAFA Kagame Cup.

APR v Red Arrows

Photo: APR yatsindiwe ku mukino wa nyuma wa CECAFA Kagame Cup iheruka na Red Arrows kuri penaliti 10-9.

Amatsinda ya CECAFA Kagame Cup 2025:

Itsinda A: Singida Black Stars (Tanzania), Garde Cotes (Djibouti), Ethiopian Coffee (Ethiopia), Kenya Police (Kenya).

Itsinda B: APR (Rwanda), NEC (Uganda), Bumamuru (Burundi), Mlandege (Zanzibar).

Itsinda C: Al Hilal (Sudani), Kator (Sudani y'Epfo), Mogadishu City Club (Somalia), Al-Ahly SC Wad Madani (Sudani).