APR FC yatomboye Pyramids, yegukanye irushanwa riheruka, mu ijonjora rya mbere rya CAF Champions League, nk'uko byavuye muri tombola yabereye i Dar es Salaam ku gicamunsi cyo kuri uyu wa Gatandatu, tariki 9 Kanama 2025.

Ni inshuro ya gatatu yikurikiranya aya makipe yombi agiye guhurira mu majonjora ya CAF Champions League, gusa mu myaka ibiri ishize yahuriraga mu ijonjora rya kabiri.

Mu 2023, Pyramids yasezereye APR mu ijonjora rya kabiri rya Champions League ku giteranyo cy'ibitego 6-1.

Ni mu gihe mu 2024, iyi kipe yo mu Misiri yasezereye APR ku giteranyo cy'ibitego 4-2 mu ijonjora rya kabiri nabwo.

Pyramids yegukanye CAF Champions League iheruka, itsinze Mamelodi Sundowns yo muri Afurika y'Epfo ku mukino wa nyuma ibitego 3-2 mu mikino yombi, iba inshuro ya mbere yegukanye iri rushanwa.

Umukino ubanza hagati ya Pyramids na APR uzabera i Kigali hagati ya tariki 19 na 21 Nzeri 2025, mu gihe uwo kwishyura uzaba nyuma y'icyumweru kimwe.

APR FC izaba irwana no kwandika amateka ikagera mu matsinda y'iri rushanwa – intego imaze imyaka irenga 20 itarageraho – dore ko itararenga ijonjora rya kabiri muri icyo gihe.

Mu gihe yasezerera Pyramids, APR izahura n'izava hagati ya Ethiopian Insurance FC yo muri Ethiopia na Mlandege FC Zanzibar mu ijonjora rya kabiri.

Al Ahly yo mu Misiri na Mamelodi Sundowns niyo makipe yonyine atazakina ijonjora rya mbere rya CAF Champions League kubera uko yitwaye mu myaka ishize, aho azahera mu ijonjora rya kabiri.