Rwanda Premier League yatangaje ko shampiyona y'u Rwanda ya ruhago y'umwaka w'imikino wa 2025-26 izatangira tariki 12 Nzeri 2025, maze isozwe tariki 24 Gicurasi 2026.

Nubwo uko amakipe 16 azahura muri iyi shampiyona bitarashyirwa hanze, ariko ugendeye ku ngengabihe yashyizwe hanze, imikino hafi ya yose izajya ikinwa mu mpera z'icyumweru, ni ukuvuga ku wa Gatanu, ku wa Gatandatu, ndetse no ku Cyumweru.

Uretse umunsi wa kabiri wa shampiyona uzatangira ku wa Kane ugasozwa ku wa Gatandatu, umunsi wa 13 uzatangira ku wa Kabiri ugasozwa umunsi ukurikiyeho, ndetse n'umunsi wa 19 nawo uzatangira ari ku wa Kabiri.

Shampiyona y'u Rwanda izatangira havuyemo imikino y'amakipe y'ibihugu, aho Amavubi azakina na Nigeria ndetse na Zimbabwe ku wa 6 Nzeri no ku wa 9 Nzeri 2025.

Mu ntangiriro z'umwaka w'imikino, hazakinwa imikino y'umunsi wa mbere, iy'uwa kabiri, ndetse n'iy'uwa gatatu, maze hafatwe ikiruhuko gito kubera imikino y'amakipe y'ibihugu (hagati ya tariki 6 na 14 Ukwakira 2025), aho shampiyona izongera kugaruka tariki 17 Ukuboza hakinwa imikino y'umunsi wa kane.

Iyi shampiyona y'umwaka w'imikino wa 2025-26 yagombaga gutangira tariki 15 Kanama 2025, ariko yegezwa inyuma kubera ibikorwa bitandukanye birimo Umunsi w'Igikundiro utegurwa na Rayon Sports, Inkera y'Abahizi yateguwe na APR, ndetse n'imikino y'ikipe y'igihugu y'u Rwanda, itegerejwe mu ntangiriro za Nzeri 2025.

Nk'uko bisanzwe shampiyona izabanzirizwa n'umukino wa Super Cup, aho kuri iyi nshuro uzahuza APR, yegukanye shampiyona y'umwaka w'imikino ushize ndetse n'Igikombe cy'Amahoro, ndetse na Rayon Sports, yasoreje ku mwanya wa kabiri muri shampiyona iheruka.