Mu magambo meza asize umunyu, umuhanzikazi Simi yifurije umugabo we Adekunle Gold isabukuru nziza y’amavuko.

Simi yifashishije urubuga rwe rwa Instagram, kuri uyu wa 28 Mutarama 2026, agaragariza urukundo rudasanzwe umugabo we wujuje imyaka 39.

Yagize ati “Mukunzi wanjye, rukundo rwanjye, mugabo wanjye, uwanteye inda. Turagukunda cyane, ntubyibagirwe. Isabukuru nziza, mukunzi wanjye.”

Aba bombi kandi baritegura kwibaruka umwana wabo wa kabiri, dore ko hashize igihe gito hasakajwe amashusho agaragaza ko Simi atwite, , ibintu byishimiwe n’abafana babo ku mbuga nkoranyambaga.

Ni mu gihe, umwana wabo w’imfura, Adejare Kosoko, yagaragaye mu mashusho yashyizwe kuri Instagram ya Simi, yifuriza se isabukuru nziza y’amavuko abinyujije mu muvugo.

Ati "Papa, ndashaka kukwandikira umuvugo muto ube nk’akantu k’urukundo. Uri papa wanjye, uri mwiza, uri mwiza…isabukuru nziza. Ndagukunda papa wanjye."

Simi na Adekunle Gold barushinze ku wa 9 Mutarama 2019, aho kugeza ubu bafitanye umwana umwe w’umukobwa, Adejare Kosoko, wavutse muri Gicurasi 2020.

Simi w’imyaka 37 yamenyekanye cyane mu ndirimbo zirimo “Joromi”, “Duduke”, “Jericho”, na “Logba Logba”, ndetse yanakoranye indirimbo zirenga eshanu n’umugabo we zirimo “No Forget”, "Take Me Back", ndetse n’izindi nyinshi.