Umutoza w'ikipe y'igihugu y'u Rwanda 'Amavubi,' Adel Amrouche, yahamagaye abakinnyi 28 azifashisha mu mikino ibiri yo gushaka itike y'Igikombe cy'Isi cya 2026.

Mu bakinnyi yahamagaye harimo rutahizamu wa Rutsiro Habimana Yves, wahamagawe bwa mbere mu ikipe y'igihugu nkuru.

Ni mu gihe, Hakim Sahabo na Rafael York, bari bamaze igihe barakumiriwe n'umutoza Frank Torsten Spittler, watandukanye n'Amavubi mu mpera za 2024, bongeye guhamagarwa.

Umunyezamu wa APR, Ishimwe Pierre, umaze iminsi abanza mu kibuga muri iyi kipe y'Ingabo z'u Rwanda, nawe yongeye guhamagarwa mu ikipe y'igihugu cyo kimwe na Manishimwe Djabel ukina muri Iraq.

Adel Amrouche, wagizwe umutoza mukuru w'Amavubi ku wa 2 Werurwe 2025, azatoza umukino we wa mbere tariki 21 Werurwe 2025 ubwo u Rwanda ruzakira Nigeria kuri Amahoro Stadium mu mukino w'umunsi wa gatanu wo mu Itsinda C mu gushaka itike y'Igikombe cy'Isi cya 2026.

Ni mu gihe nyuma y'iminsi ine u Rwanda ruzakira Lesotho kuri Amahoro Stadium mu mukino w'umunsi wa gatandatu mu gushaka itike y'Igikombe cy'Isi cya 2026.

Kuri ubu Amavubi ayoboye Itsinda C n'amanota arindwi nyuma y'imikino ine amaze gukina, aho yatsinze ibiri – uwa Afurika y'Epfo n'uwa Lesotho, anganya na Zimbabwe, atsindwa na
Benin.

Abakinnyi 28 bahamagawe:

Abanyezamu: Ntwari Fiacre, Buhake Twizere Clement, Wenssen Maxim, na Ishimwe Pierre.

Ba myugariro: Omborenga Fitina, Byiringiro Jean Gilbert, Niyomugabo Claude, Bugingo Hakim, Mutsinzi Ange, Manzi Thierry, Niyigena Clement, na Nshimiyimana Yunusu.

Abakina hagati: Iraguha Hadji, Muhire Kevin, Samuel Gueulette, Bizimana Djihad, Ruboneka Jean Bosco, Mugisha Bonheur, Rubanguka Steve, Kwizera Jojea, na Mugisha Gilbert.

Ba rutahizamu: Sahabo Hakim, Ishimwe Anicet, Rafael York, Manishimwe Djabel, Habimana Yves, Nshuti Innocent, Mugisha Didier.