APR FC yasezerewe muri CECAFA Kagame Cup ya 2026, nyuma yo gusoza imikino yo mu matsinda iri ku mwanya wa gatatu.

Iyi kipe, imaze kwegukana iri rushanwa inshuro eshatu, yatsinze Vipers SC ibitego 2-1 mu mukino wa nyuma wo mu itsinda wabereye kuri Stade Amahoro kuri uyu wa Kane.

Gusa iyi ntsinzi ntiyari ihagije, dore ko APR FC yahise igira amanota atandatu gusa ifite umwenda w'ibitego bibiri.

Iyi kipe y’Ingabo z’Igihugu yagiye mu mukino ibizi ko kugira ngo ikomeze muri 1/2, isabwa gutsinda ibitego byinshi ku buryo iva mu mwenda, ariko ikanategereza mu mukino wa Gor Mahia na Garde Républicaine, biri kumwe mu Itsinda A.

Mamadou Traore na Djibril Ouattara bafashije APR FC kubona intsinzi, gusa ntiyari ihagije kugira ngo ikomeze muri 1/2. Ni mu gihe, Gusto Mulongo yatsindiye Vipers SC.

Gor Mahia yayoboye iri tsinda nyuma yo gutsinda Garde Républicaine igitego 1-0, ihita yuzuza amanota atandatu, aho izigamye n'ibitego bitanu, ndetse ikatisha n'itike ya 1/2.

Ni mu gihe, Vipers yasoreje ku mwanya wa kabiri n'amanota atandatu, izigamye ibitego bitatu. Iyi kipe yo muri Uganda izategereza ibizava mu Itsinda C kugira ngo imenye niba izakomeza muri 1/2 nk'ikipe yabaye iya kabiri yitwaye neza.

Ibitego 5-0 yatsinzwe na Gor Mahia mu mukino wa mbere nibyo byatumye APR FC isezererwa itarenze amatsinda.

APR FC yari yabaye iya gatatu muri CECAFA Kagame Cup ya 2025.