Rwanda Premier League yatangaje ko shampiyona y'icyiciro cya mbere izasubukurwa mu mpera z'iki cyumweru, hakinwa umukino w'umunsi wa gatandatu, wari wasubitswe kubera gahunda z'ikipe y'igihugu 'Amavubi.

Uru rwego, rureberera rukanayobora shampiyona y'icyiciro cya mbere, rwisubiyeho nyuma y'inama rwagiranye n'amakipe akina muri iyi shampiyona ndetse n'ishyirahamwe ry'umupira w'amaguru mu Rwanda 'FERWAFA' tariki 15 Ukwakira 2024.

Mu itangazo yashyize ku mbuga nkoranyambaga zayo, Rwanda Premier League yagize iti "Nyuma y'ibiganiro n'abayobozi b'amakipe ndetse na FERWAFA, Rwanda Premier League izakomeza ku matariki ya 19, 20, na 21 Ukwakira 2024 hakinwa umunsi wa 6."

Tariki 10 Ukwakira 2024 nibwo Rwanda Premier League yari yatangaje ko umunsi wa gatandatu usubitswe kubera gahunda z'ikipe y'igihugu.

Kuva ubwo, abakinnyi, abatoza, abakunzi b'umupira w'amaguru nyarwanda ndetse n'abandi bawukurikiranira hafi, bagiye bagaragaza imbogamizi z'iryo subikwa rya shampiyona.

Ishimwe Fistona wa Rayon Sports yabwiye B&B Kigali ko isubikwa rya shampiyona ridindiza abakinnyi kubera ko umukinnyi agirwa n'imikino.

Yagize ati "Ubundi iyo umukinnyi ari gukina nibwo aba umukinnyi. Rero iyo shampiyona itangiye umukinnyi agakina umukino umwe cyangwa ibiri agahagarara, hagashira igihe kingana gutya bimusubiza inyuma kubera ko urwego yari agezeho ruhita rusubira inyuma agatangira bushya."

Yakomeje ati "Ni ikintu kibi gituma urwego rw'abakinnyi rutazamuka ahubwo ruhora hahandi."

Imwe mu mikino itegerejwe cyane mu mpera z'iki cyumweru, harimo uzahuza Rayon Sports na Bugesera ndetse ndetse n'uzahuza APR na Gasogi United kuri uyu wa Gatandatu saa cyenda na saa kumi n'Ebyiri z'umugoroba kuri Kigali Pele Stadium.