Real Madrid yageze muri 1/4 cya UEFA Champions League, nyuma yo gusezerera Atlético Madrid kuri penaliti 4-2 muri 1/8 mu ijoro ryo ku wa Gatatu, tariki 12 Werurwe 2025.

Atlético Madrid yatsinze ReaI Madrid, yegukanye irushanwa riheruka, igitego 1-0 mu mukino wo kwishyura wa 1/8 wabereye kuri Metropolitano Stadium, bituma hitabazwa penaliti maze abasore ba Carlo Ancelotti bitwara neza.

Igitego cyatsinzwe na Conor Gallagher ku munota wa mbere ni cyo cyatandukanyije aya makipe y'i Madrid mu minota 120 yakinwe mu mukino wo kwishyura wa 1/8, nyuma y'uko Vinicius Jr ananiwe gutsindira Real Madrid penaliti yahawe ku munota wa 70 ku ikosa Clement Lenglet yakoreye Kylian Mbappe mu rubuga rw'amahina.

Amakipe yombi yahise anganya ibitego 2-2 mu mikino ibiri, dore ko Real Madrid yari yatsinze Atlético ibitego 2-1 mu mukino ubanza.

Hitabajwe penaliti kugira ngo haboneke ikipe ikomeza muri 1/4, maze penaliti Julian Alvarez yatsinze ariko ikangwa na VAR kubera ko yakoze ku mupira kabiri, ituma Atlético isezererwa kuri penaliti 4-2.

Alexander Sørloth na Ángel Correa ba Atlético batsinze penaliti zabo, mu gihe Marcos Llorente yayirase.

Ku ruhande rwa Real Madrid, Lucas Vazquez ni we warase penaliti wenyine, naho Mbappe, Jude Bellingham, Federico Valverde, na Antonio Rüdiger barazitsinda.

Real Madrid, yegukanye UEFA Champions League inshuro nyinshi (15) kurusha andi makipe yose, izahura na Arsenal muri 1/4.

Andi makipe yakomeje muri 1/4 mu ijoro ryakeye arimo Dortmund yasezereye Lille ku giteranyo cy'ibitego 3-2 mu mikino yombi, nyuma yo kuyitsinda ibitego 2-1 mu mukino wo kwishyura.

Aston Villa yasezereye Club Brugge ku giteranyo cy'ibitego 6-1 mu mikino yombi, naho Arsenal isezerera PSV Einhoven ku giteranyo cy'ibitego 9-3 nyuma y'uko amakipe yombi anganyije ibitego 2-2 mu mukino wo kwishyura.

Imikino ibanza ya 1/4 iteganyijwe tariki 8 na 9 Mata 2025, naho iyo kwishyura ikinwe nyuma y'icyumweru kimwe.

Tchouameni v Julian Alvarez

Photo: Aurélien Tchouaméni wa Real Madrid ahanganiye umupira na Julián Alvarez wa Atlético Madrid.

Uko amakipe azahura muri 1/4:

Bayern Munich v Inter Milan

Arsenal v Real Madrid

Barcelona v Dortmund

PSG v Aston Villa