Umutoza Aliou Cissé yatandukanye na Senegal

Ikipe y'igihugu y’umupira w’amaguru ya Senegal yatandukanye n’umutoza wayo Aliou Cissé, nyuma y’imyaka icyenda ayitoza.

Cissé, wari ufite amasezerano azarangira mu mpeshyi ya 2026, atandukanye na Les Lions de la Teranga nyuma yuko iyi kipe itangiye urugendo rwo gushaka tike y’igikombe cy’Afurika cya 2025 inganya na Burkina Faso igitego 1-1 ikanatsinda u Burundi 1-0.

Uyu mugabo w’imyaka 48 yagizwe umutoza wa Senegal muri Werurwe 2015 nyuma y’imyaka ibiri atoza ikipe y’igihugu ya Senegal y’abari munsi y’imyaka 23. Mu myaka icyenda yaramaranye nayo, yayifashije kwegukana igikombe cy’Afurika mu 2021, atsinze Misiri kuri penaliti 4-2 ku mukino wa nyuma, nyuma yo kunganya 0-0.

Gusa mu gikombe cy’Afurika giheruka kubera muri Ivory Coast mu ntangiriro z’uyu mwaka, Cissé ntiyabashije kugeza kure Senegal dore ko yasezerewe na Ivory Coast, yegukanye iryo rushanwa, muri 1/8 kuri penaliti 5-4.

Cissé atandukanye na Senegal, yanakiniye hagati ya 1999-2005, mu gihe iyi kipe y’igihugu iri kwitegura guhura na Malawi mu mikino ibiri iteganyijwe tariki 11 na 15 Ukwakira 2024 mu gushaka tike y’igikombe cy’Afurika cya 2025.