Tombola: Real Madrid izakina na Man City muri kamarampaka ya Champions League

Real Madrid izahura na Manchester City mu mikino ya kamarampaka ya UEFA Champions League, izatanga andi makipe umunani azabona itike ya 1/8.

Ibi byavuye muri tombola yabaye ku gicamunsi cyo kuri uyu wa Gatanu, tariki 31 Mutarama 2025.

Aya makipe yombi amaze guhura mu mikino yo gukuranamwo ya UEFA Champions League mu myaka itatu iheruka yikurikiranya, aho Real Madrid yasezereye Manchester City muri 1/2 cy'iri rushanwa mu 2022, mu gihe mu 2023, Manchester City yihimuye ikayisezerera muri 1/2.

Mu 2024, Real Madrid yasezereye Manchester City muri 1/4.

Amakipe azanyura mu mikino ya kamarampaka ni ayasoreje kuva ku mwanya wa cyenda kugeza ku mwanya wa 24 nyuma y'imikino umunani ya mbere yabaye muri UEFA Champions League, yahinduriwe uburyo ikinwamo guhera muri uyu mwaka w'imikino.

Amakipe umunani azakomeza nyuma y'imikino ibiri, ubanza n'uwo kwishyura, ya kamarampaka azahita atomborana n'andi umunani yasoreje mu myanya umunani ya mbere, muri 1/8 cy'iri rushanwa.

Ni mu gihe amakipe yasoreje kuva ku mwanya wa 25 kugeza ku mwanya wa 36, yahise asezererwa.

Imikino ibanza ya kamarampaka izaba tariki 11 Gashyantare 2025, naho iyo kwishyura ikinwe tariki 18 Gashyantare 2025.